Matthew 15

א אָז בָּאוּ אֶל־יֵשׁוּעַ הַסּוֹפְרִים וְהַפְּרוּשִׁים אֲשֶׁר מִירוּשָׁלָיִם׃

ב וַיּׂאמְרוּ מַדּוּעַ תַּלְמִידֶיךָ עׂבְרִים אֵת קַבָּלַת הַזְּקֵנִים כִּי אֵינָם נׂטְלִים יְדֵיהֶם לַסְּעוּדָה׃

ג וַיַּעַן וַיּׂאמֶר אֲלֵיהֶם מַדּוּעַ גַּם־אַתֶּם עׂבְרִים אֶת־מִצְוַת אֱלׂהִים לְמַעַן קַבָּלַתְכֶם׃

ד כִּי הָאֱלׂהִים צִוָּה לֵאמׂר כַּבֵּד אֶת־אָבִיךָ וְאֶת־אִמֶּךָ וּמְקַלֵּל אָבִיו וְאִמּוֹ מוֹת יוּמָת׃

ה וְאַתֶּם אׂמְרִים הָאׂמֵר לְאָבִיו וּלְאִמּוֹ קָרְבָּן מַה־שָּׁאַתָּה נֶהֱנֶה לִי אֵינוֹ חַיָּב בְּכִבּוּד אָבִיו וְאִמּוֹ׃

ו וַתָּפֵרוּ אֶת־דְּבַר הָאֱלׂהִים לְמַעַן קַבָּלַתְכֶם׃

ז חֲנֵפִים הֵיטֵב נִבָּא עֲלֵיכֶם יְשַׁעְיָהוּ לֵאמׂר׃

ח נִגַּשׁ הָעָם הַזֶּה בְּפִיו וּבִשְׂפָתָיו כִּבְּדוּנִי וְלִבָּם רָחַק מִמֶּנִּי׃

ט וַתְּהִי יִרְאָתָם אׂתִי מִצְוַת אֲנָשִׁים מְלֻמָּדָה׃

י וַיִּקְּרָא אֶל־הָעָם וַיּׂאמֶר לָהֶם שִׁמְעוּ וְהָבִינוּ׃

יא לׂא הַנִּכְנָס אֶל־הַפֶּה יְטַמֵּא אֶת־הָאָדָם כִּי אִם־הַיּוֹצֵא מִן־הַפֶּה הוּא מְטַמֵּא אֶת־הָאָדָם׃

יב וַיִגְּשׁוּ אֵלָיו תַּלְמִידָיו וַיּׂאמְרוּ הֲיָדַעְתָּ כִּי הַפְּרוּשִׁים שָׁמְעוּ אֶת־הַדָּבָר הַזֶּה וַיִּכָּשְׁלוּ־בוֹ׃

יג וַיַּעַן וַיּׂאמַר כָּל־מַטָּע אֲשֶׁר לׂא נָטַע אָבִי שֶׁבַּשָׁמַיִם עָקוֹר יֵעָקֵר׃

יד הַנִּיחוּ אוֹתָם מַדְרִיכִים עִוְרִים הֵמָּה לַעִוְרִים וְכִי־יַדְרִיךְ עִוֵּר אֶת־הָעִוֵּר וְנָפְלוּ שְׁנֵיהֶם אֶל־הַשָׁחַת׃

טו וַיַּעַן פֶּטְרוֹס וַיּׂאמֶר אֵלָיו בָּאֵר לָנוּ אֶת־הַמָּשָׁל הַזֶּה׃

טז וַיּׂאמֶר יֵשׁוּעַ עֲדֶנָה גַם־אַתֶּם לׂא תַשְׂכִּילוּ׃

יז הַעוֹד לׂא תֵדְעוּ כִּי כָל־הַבָּא אֶל־הַפֶּה יוֹרֵד אֶל־הַכֶּרֶשׂ וְיִשָׁפֵךְ מִשָׁם לְמוֹצָאוֹת׃

יח אֲבָל הַיּוֹצֵא מִן־הַפֶּה יוֹצֵא מִן־הַלֵּב וְהוּא מְטַמֵּא אֶת־הָאָדָם׃

יט כִּי מִן־הַלֵּב יוֹצְאוֹת מַחְשְׁבוֹת רָע רְצִיחוֹת נִאוּפִים זְנוּנִים גְּנֵבוֹת עֵדוּת שֶׁקֶר וְגִדּוּפִים׃

כ אֵלֶּה הֵם הַמְטַמְּאִים אֶת־הָאָדָם אֲבָל אֲכִילָה בְּלׂא נְטִילַת יָדַיִם לׂא תְּטַמֵּא אֶת־הָאָדָם׃

כא וַיֵּצֵא יֵשׁוּעַ מִשָׁם וַיָּסַר אֶל־גְּלִילוֹת צוֹר וְצִידוֹן׃

כב וְהִנֵּה אִשָׁה כְנַעֲנִית יׂצֵאת מִן־הַגְּבוּלוֹת הָהֵם וַתִּצְעַק אֵלָיו לֵאמׂר חָנֵּנִי אֲדׂנִי בֶן־דָּוִד כִּי בִתִּי מְעֻנָּה מְאׂד עַל־יְדֵי שֵׁד׃

כג וְלׂא־עָנָה אׂתָהּ דָּבָר וַיִּגְּשׁוּ תַלְמִידָיו וַיְבַקְשׁוּ מִמֶּנּוּ לֵאמׂר שַׁלְּחֶהָ כִּי־צׂעֶקֶת הִיא אַחֲרֵינוּ׃

כד וַיַּעַן וַיּׂאמַר לׂא שֻׁלַּחְתִּי בִּלְתִּי אֶל־הַצּׂאן הָאׂבְדוֹת אֲשֶׁר לְבֵית יִשְׂרָאֵל׃

כה וְהִיא בָאָה וַתִּשְׁתַּחוּ לוֹ וַתּׂאמַר אֲדׂנִי עָזְרֵנִי׃

כו וַיַּעַן וַיּׂאמַר לׂא־טוֹב לָקַחַת אֶת־לֶחֶם הַבָּנִים וּלְהַשְׁלִיכוֹ לִפְנֵי צְעִירֵי הַכְּלָבִים׃

כז וַתּׂאמַר כֵּן אֲדׂנִי אֶפֶס כִּי־גַם־צְעִירֵי הַכְּלָבִים יׂאכְלוּ מִן־הַפֵּרוּרִים הַנּׂפְלִים מֵעַל־שֻׁלְחַן אֲדׂנֵיהֶם׃

כח וַיַּעַן יֵשׁוּעַ וַיּׂאמֶר אֵלֶיהָ אִשָׁה רַבָּה אֱמוּנָתֵךְ יְהִי־לָךְ כִּרְצוֹנֵךְ וַתֵּרָפֵא בִתָּהּ מִן־הַשָׁעָה הַהִיא׃

כט וַיַּעֲבֹר יֵשׁוּעַ מִשָׁם וַיָּבֹא אֶל־יָם הַגָּלִיל וַיַּעַל הָהָרָה וַיֵּשֶׁב שָׁם׃

ל וַיָּבֹאוּ אֵלָיו הֲמוֹן עַם רָב וְעִמָּהֶם פִּסְחִים עִוְרִים אִלְּמִים קִטְּעִים וְרַבִּים כָּהֵמָּה וַיַּפִּילוּם לְרַגְלֵי יֵשׁוּעַ וַיִּרְפָּאֵם׃

לא וַיִּתְמְהוּ הָעָם בִּרְאוֹתָם אֶת־הָאִלְּמִים מְדַבְּרִים וְהַקִּטְּעִים בְּרִיאִים וְהַפִּסְחִים מְהַלְּכִים וְהַעִוְרִים רׂאִים וַיְשַׁבְּחוּ אֶת־אֱלׂהֵי יִשְׂרָאֵל׃

לב וַיִּקְרָא יֵשׁוּעַ אֶל־תַּלְמִידָיו וַיּׂאמַר נִכְמְרוּ רַחֲמַי עַל־הָעָם כִּי־זֶה עָמְדָם עִמָּדִי שְׁלׂשֶׁת יָמִים וְאֵין לָהֶם מַה־לֶּאֱכׂל וְאֵינֶנִּי חָפֵץ לְשַׁלְּחָם רְעֵבִים פֶּן־יִתְעַלְּפוּ בַּדָּרֶךְ׃

לג וַיּׂאמְרוּ אֵלָיו הַתַּלְמִידִים מֵאַיִן לָנוּ בַּמִדְבָּר דֵּי־לֶחֶם לְהַשְׂבִּיעַ אֶת־הָמוֹן רַב כָּזֶה׃

לד וַיּׂאמֶר יֵשׁוּעַ אֲלֵיהֶם כַּמָּה כִכְּרוֹת לֶחֶם לָכֶם וַיּׂאמְרוּ שֶׁבַע וּמְעַט דָּגִים קְטַנִּים׃

לה וַיְצַו אֶת־הֲמוֹן הָעָם וַיֵּשְׁבוּ לָאָרֶץ׃

לו וַיִּקַּח אֶת־שֶׁבַע כִּכְּרוֹת הַלֶּחֶם וְאֵת הַדָּגִים וַיְבָרֶךְ וַיִּפְרׂס וַיִּתֵּן אֶל־הַתַּלְמִידִים וְהַתַּלְמִידִים נָתְנוּ לָעָם׃

לז וַיּׂאכְלוּ כֻלָּם וַיִּשְׂבָּעוּ וַיִּשְׂאוּ מִן־הַפְּתוֹתִים הַנּוֹתָרִים שִׁבְעָה דוּדִים מְלֵאִים׃

לח וְהָאׂכְלִים אַרְבַּעַת אֲלָפִים אִישׁ מִלְּבַד הַנָּשִׁים וְהַטָּף׃

לט וַיְשַׁלַּח אֶת־הָעָם וַיֵּרֶד בָּאֳנִיָה וַיָּבֹא אֶל־גְּבוּל מַגְדָן׃