Luke 15

א וַיְהִי בִּקְרׂב אֵלָיו כָּל־הַמּוֹכְסִים וְהַחַטָּאִים לִשְׁמׂעַ אוֹתוֹ׃

ב וַיִּלּוֹנוּ הַפְּרוּשִׁים וְהַסּוֹפְרִים לֵאמׂר הָאִישׁ הַזֶּה מְקַבֵּל אֶת־הַחַטָּאִים וְאׂכֵל אִתָּם׃

ג וַיִּשָׂא אֶת־הַמָּשָׁל הַזֶּה וַיּׂאמַר אֲלֵיהֶם׃

ד מִי בָכֶם הָאִישׁ אֲשֶׁר־לוֹ מֵאָה כְבָשִׂים וְאָבַד לוֹ אֶחָד מֵהֶם וְלׂא יִטּוֹשׁ אֶת־הַתִּשְׁעִים וְתִשְׁעָה בַּמִּדְבָּר וְהָלַךְ אַחֲרֵי הָאׂבֵד עַד כִּי־יִמְצָאֵהוּ׃

ה וְהָיָה כְּמָצְאוֹ אׂתוֹ יְשִׂימֶנּוּ עַל־כְּתֵפָיו בְּשִׂמְחָה׃

ו וּבָא אֶל־בֵּיתוֹ וְקָרָא לְאׂהֲבָיו וְלִשְׁכֵנָיו יַחַד לֵאמׂר שִׂמְחוּ אִתִּי כִּי מָצָאתִי אֶת־שֵׂיִי הָאׂבֵד׃

ז אׂמֵר אֲנִי לָכֶם כֵּן שִׂמְחָה תִהְיֶה בַּשָּׁמַיִם עַל־חוֹטֵא אֶחָד אֲשֶׁר שָׁב יוֹתֵר מֵעַל־תִּשְׁעִים וְתִשְׁעָה צַדִּיקִים אֲשֶׁר לׂא־יִצְטָרְכוּ לִתְשׁוּבָה׃

ח אוֹ מִי הָאִשָּׁה אֲשֶׁר־לָהּ עֲשָׂרָה דַרְכְּמוֹנִים וְאָבַד לָהּ דַּרְכְּמוֹן אֶחָד וְלׂא־תַדְלִיק נֵר וּתְטַאטֵא אֶת־הַבַּיִת וּתְחַפֵּשׂ הֵיטֵב עַד כִּי־תִמְצָאֵהוּ׃

ט וְהָיָה כְּמָצְאָהּ אוֹתוֹ תִּקְרָא לְרֵעוֹתֶיהָ וְלִשְׁכֵנוֹתֶיהָ לֵאמׂר שְׂמַחְנָה אִתִּי כִּי מָצָאתִי אֵת הַדַּרְכְּמוֹן אֲשֶׁר אָבַד לִי׃

י כֵּן אֲנִי אׂמֵר לָכֶם תִּהְיֶה שִׂמְחָה לִפְנֵי מַלְאֲכֵי אֱלׂהִים עַל־חוֹטֵא אֶחָד אֲשֶׁר־שָׁב מֵחַטָּאתוֹ׃

יא וַיּׂאמַר אִישׁ אֶחָד הָיוּ לוֹ שְׁנֵי בָנִים׃

יב וַיּׂאמֶר הַצָּעִיר אֶל־אָבִיו אָבִי תְּנָה־לִּי אֶת־חֵלֶק הַנְּכָסִים אֲשֶׁר יִפּׂל לִי וַיְחַלֵּק לָהֶם אֶת־הַנַּחֲלָה׃

יג וַיְהִי מִקֵּץ יָמִים וַיֶּאֱסׂף הַבֵּן הַצָּעִיר אֶת־הַכּׂל וַיֵּלֶךְ אֶל־אֶרֶץ רְחוֹקָה וַיְהִי זוֹלֵל וְסׂבֵא וַיְפַזֵּר שָׁם אֶת־רְכֻשׁוֹ׃

יד וְאַחֲרֵי כַלּוֹתוֹ אֶת־הַכּׂל הָיָה רָעָב חָזָק בָּאָרֶץ הַהִיא וַיָּחֶל לִהְיוֹת חֲסַר־לָחֶם׃

טו וַיֵּלֶךְ וַיִּדְבַּק בְּאֶחָד מִבְּנֵי הַמְּדִינָה בָּאָרֶץ הַהִיא וַיִּשְׁלַח אוֹתוֹ אֶל־שְׂדוֹתָיו לִרְעוֹת חֲזִירִים׃

טז וַיִּתְאָו לְמַלֵּא בִטְנוֹ מֵהַחֲרוּבִים אֲשֶׁר יׂאכְלוּ הַחֲזִירִים וְאֵין נׂתֵן לוֹ׃

יז וַיָּשֶׁב אֶל־לִבּוֹ וַיּׂאמַר מָה־רַבּוּ שְׂכִירֵי אָבִי אֲשֶׁר יֵשׁ לָהֶם לֶאֱכׂל דַּיָּם וְהוֹתֵר וַאֲנִי אׂבֵד בָּרָעָב׃

יח אָקוּמָה־נָּא וְאֵלְכָה אֶל־אָבִי וְאׂמַר אֵלָיו אָבִי חָטָאתִי גַּם לְשָׁמַיִם גַּם לְפָנֶיךָ׃

יט וּנְקַלּתִי מֵהִקָּרֵא עוֹד בְּנֶךָ שִׂימֵנִי כְּאַחַד שְׂכִירֶיךָ׃

כ וַיָּקָם וַיָּבֹא אֶל־אָבִיו עוֹדֶנּוּ מֵרָחוֹק וְאָבִיו רָאָהוּ וַיֶּהֱמוּ מֵעָיו וַיָּרָץ וַיִּפּׂל עַל־צַוָּארָיו וַיִּשָּׁקֵהוּ׃

כא וַיּׂאמֶר אֵלָיו הַבֵּן אָבִי חָטָאתִי גַּם לְשָׁמַיִם גַּם לְפָנֶיךָ וַאֲנִי נְקַלּתִי מֵהִקָּרֵא עוֹד בְּנֶךָ׃

כב וַיּׂאמֶר הָאָב אֶל־עֲבָדָיו הָבִיאוּ אֶת־הַשִׂמְלָה הַיָּפָה וְהַלְבִּישֻׁהוּ וּתְנוּ טַבַּעַת עַל־יָדוֹ וּנְעָלִים בְּרַגְלָיו׃

כג וְהָבִיאוּ עֵגֶל הַמַּרְבֵּק וְטִבְחוּ אׂתוֹ וְנׂאכְלָה וְנִשְׂמָח׃

כד כִּי זֶה־בְּנִי הָיָה מֵת וַיֶּחִי וְאׂבֵד וַיִּמָּצֵא וַיָּחֵלּוּ לִשְׂמׂחַ׃

כה וּבְנוֹ הַגָּדוֹל בַּשָׂדֶה וַיְהִי בְשׁוּבוֹ כַּאֲשֶׁר קָרַב אֶל־הַבַּיִת וַיִּשְׁמַע קוֹל זִמְרָה וּמְחׂלוֹת׃

כו וַיִּקְרָא אֶל־אַחַד הַנְּעָרִים וַיִּשְׁאַל לָדַעַת מַה־הַדָּבָר׃

כז וַיּׂאמֶר אֵלָיו כִּי־בָא אָחִיךָ וַיִּטְבַּח אָבִיךָ עֵגֶל הַמַּרְבֵּק עַל־אֲשֶׁר שָׁב אֵלָיו בְּשָׁלוֹם׃

כח וַיִּחַר לוֹ וַיְמָאֵן לָבוֹא הַבָּיְתָה וַיֵּצֵא אָבִיו וַיְדַבֵּר עַל־לִבּוֹ׃

כט וַיַּעַן וַיּׂאמֶר אֶל־אָבִיו הִנֵּה זֶה שָׁנִים רַבּוֹת אָנׂכִי עׂבֵד אׂתְךָ וּמִיָּמַי לׂא עָבַרְתִּי אֶת־מִצְוָתֶךָ וְאַתָּה מִיָּמַי לׂא־נָתַתָּ לִּי גְּדִי לְמַעַן אָשִׂישׂ עִם־רֵעָי׃

ל וְעַתָּה בָּא בִנְךָ־זֶה אֲשֶׁר בִּלַּע אֶת־נַחֲלָתְךָ עִם־הַזּׂנוֹת וַתִּזְבַּח־לוֹ אֶת־עֵגֶל הַמַּרְבֵּק׃

לא וַיּׂאמֶר אֵלָיו בְּנִי אַתָּה תָּמִיד עִמָּדִי וְכׂל אֲשֶׁר־לִי לְךָ הוּא׃

לב אֲבָל אָחִיךָ הִנֵּה רָאוּי לָשׂוּשׂ וְלִשְׂמׂחַ עָלָיו כִּי הָיָה מֵת וַיֶּחִי וְאׂבֵד וַיִּמָּצֵא׃