Hebrews 11
א כִּי הָאֱמוּנָה הִיא בִטָּחוֹן בְּמַה־שֶׁנְּצַפֶּה לוֹ וְהוֹכָחַת דְּבָרִים שֶׁאֵינָם נִרְאִים׃
ב וְהִיא שֶׁהוּעֲדָה עַל הָאָבוֹת׃
ג בָּאֱמוּנָה נָבִין כִּי־הָעוֹלָמוֹת נַעֲשׂוּ בִּדְבַר הָאֱלׂהִים לְהוֹצִיא הַנִּרְאֶה מִן־הַנֶּעְלָם׃
ד בָּאֱמוּנָה הִקְרִיב הֶבֶל לֵאלׂהִים זֶבַח טוֹב מִקָּיִן אֲשֶׁר הָיָה־לוֹ לְעֵדוּת כִּי צַדִּיק הוּא בְּהָעִיד אֱלׂהִים עַל־מִנְחׂתָיו וּבָהּ עוֹדֶנּוּ מְדַבֵּר אַחֲרֵי מוֹתוֹ׃
ה בָּאֱמוּנָה לֻקַּח חֲנוֹךְ לְבִלְתִּי רְאוֹתוֹ הַמָּוֶת וְאֵינֶנּוּ כִּי־לָקַח אׂתוֹ אֱלׂהִים וְהוּעַד עָלָיו לִפְנֵי הִלָּקְחוֹ כִּי אֶת־הָאֱלׂהִים הִתְהַלָּךְ׃
ו וּבְלִי אֱמוּנָה אִישׁ לׂא־יִהְיֶה רָצוּי לֵאלׂהִים כִּי כָל־הַקָּרֵב אֵלָיו צָרִיךְ שֶׁיַּאֲמִין כִּי־יֵשׁ אֱלׂהִים וּגְמוּל הוּא מֵשִׁיב לְדׂרְשָׁיו׃
ז בָּאֱמוּנָה נִזְהַר נׂחַ וַיַּעַשׂ אֶת־הַתֵּבָה לְהַצִּיל אֶת־בֵּיתוֹ אַחֲרֵי אֲשֶׁר־צֻוָּה עַל דְּבָרִים שֶׁלּא נִרְאִים וַיַּרְשַׁע בָּהּ אֶת־הָעוֹלָם וַיְהִי לְיׂרֵשׁ הַצְּדָקָה עֵקֶב הָאֱמוּנָה׃
ח בָּאֱמוּנָה שָׁמַע אַבְרָהָם כַּאֲשֶׁר נִקְרָא לָלֶכֶת אֶל־הָאָרֶץ אֲשֶׁר יִירָשֶׁנָּה וַיֵּצֵא וְלׂא־יָדַע אָנָא יָבוֹא׃
ט בָּאֱמוּנָה הָיָה גֵר בְּאֶרֶץ הַהַבְטָחָה כְּמוֹ בְנָכְרִיָּה וַיֵּשֶׁב בְּאׂהָלִים הוּא וְיִצְחָק וְיַעֲקׂב אֲשֶׁר־יָרְשׁוּ עִמּוֹ הַהַבְטָחָה הַהִיא׃
י כִּי־חִכָּה לָעִיר אֲשֶׁר יְסוּדָתָהּ נֶאֱמָנָה וּבוֹנָהּ וּמְכוֹנֲנָהּ הָאֱלׂהִים׃
יא בָּאֱמוּנָה שָׂרָה גַם־הִיא מָצְאָה כּׂחַ לְהַזְרִיעַ וַתֵּלֶד אַחֲרֵי בְלׂתָהּ כִּי־חָשְׁבָה אֶת־הַמַּבְטִיחַ לְנֶאֱמָן׃
יב עַל־כֵּן מֵאֶחָד אֲשֶׁר כִּמְעַט מֵת בְּשָׂרוֹ יָצְאוּ כְּכוֹכְבֵי הַשָּׁמַיִם לָרׂב וְכַחוֹל עַל־שְׂפַת הַיָּם אֲשֶׁר לׂא יִסָּפֵר׃
יג בָּאֱמוּנָה מֵתוּ כָל־אֵלֶּה וְלׂא רָאוּ אֶת־הַהַבְטָחוֹת רַק מֵרָחוֹק צִפּוּ לָהֵן וַיִּבְטְחוּ וַיִּשְׂמְחוּ לִקְרָאתָן וַיּוֹדוּ כִּי־גֵרִים הֵם וְתוֹשָׁבִים בָּאָרֶץ׃
יד כִּי הַמְדַבְּרִים כָּזׂאת מוֹדִיעִים כִּי־מַטָּרַת חֶפְצָם אֶרֶץ מוֹשָׁב׃
טו וְאִלּוּ הָיְתָה דַעְתָּם עַל־הָאָרֶץ הַהִיא אֲשֶׁר יָצְאוּ מִמֶּנָּה הִנֵּה הָיָה בְיָדָם לָשׁוּב אֵלֶיהָ׃
טז אָכֵן נִכְסְפוּ לְמוֹשָׁב טוֹב מִמֶּנּוּ וְהוּא בַּשָּׁמָיִם וְעַל־כֵּן לׂא בוֹשׁ הָאֱלׂהִים מֵהֶם לְהִקָּרֵא אֱלׂהֵיהֶם כִּי־הֵכִין לָהֶם עִיר׃
יז בָּאֱמוּנָה הָיָה מַעֲלֶה אַבְרָהָם אֶת־יִצְחָק כַּאֲשֶׁר נֻסָּה וְאֶת־יְחִידוֹ יַקְרִיב הַמְקַבֵּל אֶת־הַהַבְטָחוֹת׃
יח אֲשֶׁר נֶאֱמַר־לוֹ כִּי בְיִצְחָק יִקָּרֵא לְךָ זָרַע׃
יט וַיַּחֲשׁׂב בְּלִבּוֹ כִּי יָכוֹל אֱלׂהִים לְהַחֲיוֹת גַּם אֶת־הַמֵּתִים עַל־כֵּן גַּם־הוּשַׁב אֵלָיו לִהְיוֹת לְמָשָׁל׃
כ בָּאֱמוּנָה בֵּרַךְ יִצְחָק אֶת־יַעֲקׂב וְאֶת־עֵשָׂו וַיְדַבֵּר עַל־עֲתִידׂת לָמוֹ׃
כא בָּאֱמוּנָה בֵּרַךְ יַעֲקׂב אֶת־שְׁנֵי בְנֵי־יוֹסֵף לִפְנֵי מוֹתוֹ וַיִּשְׁתַּחוּ עַל־רׂאשׁ הַמַּטֶּה׃
כב בָּאֱמוּנָה הִזְכִּיר יוֹסֵף בִּקְרָב־קִצּוֹ אֶת־יְצִיאַת בְּנֵי יִשְׂרָאֵל וַיְצַו עַל־עַצְמוֹתָיו׃
כג בָּאֱמוּנָה הִצְפִּינוּ אֶת־משֶׁה אֲבוֹתָיו שְׁלׂשָׂה יְרָחִים אַחַר הִוָּלְדוֹ כִּרְאׂתָם אֶת־הַיֶּלֶד כִּי־טוֹב הוּא וְלׂא יָרְאוּ מִפְּנֵי מִצְוַת הַמֶּלֶךְ׃
כד בָּאֱמוּנָה מֵאֵן משֶׁה כַּאֲשֶׁר גָּדֵל לְהִקָּרֵא בֵן לְבַת־פַּרְעׂה׃
כה וַיִּבְחַר לִסְבֹּל אֶת־עֳנִי עַם־אֱלׂהִים מִלְּהִתְעַנֵּג לְשָׁעָה בְּתַעֲנוּגֵי הַחֵטְא׃
כו בְּחָשְׁבוֹ אֶת־חֶרְפַּת הַמָּשִׁיחַ לְעׂשֶׂר גָּדוֹל מֵאׂצְרוֹת מִצְרָיִם כִּי הִבִּיט אֶל־הַגְּמוּל׃
כז בָּאֱמוּנָה יָצָא מֵאֶרֶץ מִצְרַיִם וְלׂא יָרֵא מֵחֲמַת הַמֶּלֶךְ כִּי הָיָה כְּרׂאֶה אֵת אֲשֶׁר־אֵינֶנּוּ נִרְאֶה וַיִּתְחַזָּק׃
כח בָּאֱמוּנָה עָשָׂה אֶת־הַפֶּסַח וּנְתִינַת הַדָּם לְמַעַן אֲשֶׁר לׂא־יִגַּע הַמַּשְׁחִית בִּבְכוֹרֵיהֶם׃
כט בָּאֱמוּנָה עָבְרוּ אֶת־יַם־סוּף בַּיַּבָּשָׁה אֲשֶׁר נִסּוּ מִצְרַיִם גַּם־הֵמָּה לַעֲבָר־בּוֹ וַיִּטְבָּעוּ׃
ל בָּאֱמוּנָה נָפְלוּ חוֹמוֹת יְרִיחוֹ אַחֲרֵי הִקִּיפוּ אוֹתָן שִׁבְעַת יָמִים׃
לא בָּאֱמוּנָה לׂא אָבְדָה רָחָב הַזּוֹנָה עִם־הַסּוֹרֲרִים כִּי־אָסְפָה אֶת־הַמְרַגְּלִים אֶל־בֵּיתָהּ בְּשָׁלוֹם׃
לב וּמָה אׂמַר עוֹד הֵן תִּקְצַר הָעֵת מִסַּפֵּר מַעֲשֵׂי גִדְעוֹן וּבָרָק וְשִׁמְשׁוֹן וְיִפְתָּח וְדָוִד וּשְׁמוּאֵל וְהַנְּבִיאִים׃
לג אֲשֶׁר בָּאֱמוּנָה כִּבְּשׁוּ מַמְלָכוֹת וּפָעֲלוּ צֶדֶק וְהִשִׂיגוּ הַבְטָחוֹת וְסָכְרוּ פִי אֲרָיוֹת׃
לד וְכִבּוּ גְּבוּרַת הָאֵשׁ וְנִמְלְטוּ מִפִּי הַחֶרֶב וְהִתְחַזְּקוּ מְחֻלְשָׁתָם וְעָשׂוּ חַיִל בַּמִּלְחָמָה וְהִפִּילוּ מַחֲנוֹת זָרִים׃
לה נָשִׁים לָקְחוּ מִתְּחִיָּה אֶת־מֵתֵיהֶן וַאֲחֵרִים רֻטְּשׁוּ בְעִנּוּיִם וְלׂא רָצוּ לְהִנָּצֵל לְמַעַן יִזְכּוּ לִתְחִיָּה טוֹבָה מִמֶּנָּה׃
לו מֵהֶם נֻסּוּ נִסְיוֹן תַּעֲלוּלִים וּמַכּוֹת וְגַם־נִמְסְרוּ לְכֶבֶל וּמַסְגֵּר׃
לז נִסְקְלוּ בָאֲבָנִים נֻסְּרוּ בַמְּגֵרָה נִבְחֲנוּ בְיִסּוּרִים מֵתוּ לְפִי־חָרֶב וַיָּנֻעוּ עֲטוּפֵי עוֹרׂת כְּבָשִׂים וְעִזִּים בְּחׂסֶר וּבְעׂצֶר רָעָה וְיָגוֹן׃
לח אֲשֶׁר הָעוֹלָם לׂא־הָיָה כְדַי לָהֶם הֵם תָּעוּ בַּמִּדְבָּר וּבֶהָרִים וּבַמְּעָרוֹת וּבִנְקִיקֵי הָאָרֶץ׃
לט וְכָל־אֵלֶּה אַף כִּי־הוּעַד עֲלֵיהֶם בִּגְלַל אֱמוּנָתָם לׂא לָקְחוּ אֶת־הַהַבְטָחָה׃
מ לְמַעַן אֲשֶׁר לׂא־יֻשְׁלְמוּ בִּלְעָדֵינוּ כִּי צָפָה לָנוּ אֱלׂהִים מִקֶּדֶם טוֹבָה יְתֵרָה׃