Hebrews 4
א עַל־כֵּן בְּהִמָּצֵא עוֹד הַהַבְטָחָה לָבוֹא אֶל־מְנוּחָתוֹ נִירָא נָא פֶּן־יֵרָאֶה אִישׁ מִכֶּם מְאַחֵר פְּעָמָיו׃
ב כִּי גַם־אֵלֵינוּ בָּאָה הַבְּשׂוֹרָה כְּבֹאָהּ אֲלֵיהֶם וְלָהֶם לׂא־הוֹעִיל דְּבַר הַשְּׁמוּעָה מִפְּנֵי אֲשֶׁר לׂא־הִתְעָרַב בָּאֱמוּנָה לַשּׁׂמְעִים׃
ג כִּי בָּאֵי הַמְּנוּחָה אֲנַחְנוּ הַמַּאֲמִינִים כְּמוֹ שֶׁאָמַר אֲשֶׁר־נִשְׁבַּעְתִּי בְאַפִּי אִם־יְבֹאוּן אֶל־מְנוּחָתִי אַף כִּי נִגְמְרוּ מַעֲשֵׂי יְהוָֹה מֵעֵת הִוָּסֵד הָעוֹלָם׃
ד כִּי עַל־הַיּוֹם הַשְּׁבִיעִי הַכָּתוּב אׂמֵר וַיִּשְׁבֹּת בַּיּוֹם הַשְּׁבִיעִי מִכָּל־מְלַאכְתּוֹ׃
ה וְאׂמֵר עוֹד אִם־יְבֹאוּן אֶל־מְנוּחָתִי׃
ו וְיַעַן כִּי־יֶשׁ־עוֹד מָקוֹם לָבוֹא אֵלֶיהָ וַאֲשֶׁר הִתְבַּשְׂרוּ בָּרִאשׁוֹנָה הֵמָּה לׂא־בָאוּ שָׁם בְּמִרְיָם׃
ז לָכֵן הוֹסִיף לִקְבּוֹעַ יוֹם מִקֵּץ יָמִים רַבִּים בְּאָמְרוֹ עַל־יְדֵי דָוִד הַיּוֹם כְּמוֹ שֶׁנֶּאֱמַר הַיּוֹם אִם־בְּקׂלוֹ תִשְׁמָעוּ אַל־תַּקְשׁוּ לְבַבְכֶם׃
ח כִּי אִלּוּ הֵנִיחַ לָהֶם יְהוֹשֻׁעַ לׂא־הָיָה מְדַבֵּר אַחֲרֵי כֵן עַל־יוֹם אַחֵר׃
ט עַל־כֵּן נִשְׁאֲרָה עוֹד מְנוּחַת שַׁבָּת לְעַם אֱלׂהִים׃
י כִּי הַבָּא אֶל־מְנוּחָתוֹ גַּם־הוּא שָׁבַת מִמְּלַאכְתּוֹ כַּאֲשֶׁר הָאֱלׂהִים מִשֶּׁלּוֹ׃
יא לָכֵן נִשְׁקְדָה־נָּא לָבוֹא אֶל־הַמְּנוּחָה הַהִיא לְמַעַן אֲשֶׁר לׂא־יִכָּשֶׁל אִישׁ וְהָיָה מַמְרֶה כְּמוֹהֶם׃
יב כִּי־דְבַר הָאֱלׂהִים חַי הוּא וּפׂעֵל גְּבוּרוֹת וְחַד מִכָּל־חֶֶרֶב פִּיפִיּוֹת וְיׂרֵד עַד־לְהַבְדִּיל בֵּין־הַנֶּפֶשׁ וּבֵין הָרוּחַ בֵּין הַדְּבָקִים וּבֵין־הַמּוֹחַ וּבֹחֵן מַחְשְׁבוֹת לֵבָב וּמְזִמּוֹתָיו׃
יג וְאֵין יְצוּר נִסְתָּר מִלְּפָנָיו כִּי־הַכּׂל חָשׂוּף וְגָלוּי לְעֵינֵי־בַעַל דְּבָרִים שֶׁלָּנּוּ׃
יד וְעַתָּה בִּהְיוֹת־לָנוּ כּׂהֵן גָּדוֹל נַעֲלֶה מְאׂד אֲשֶׁר עָבַר אֶת־הַשָּׁמָיִם יֵשׁוּעַ בֶּן־הָאֱלׂהִים נַחֲזִיקָה בְּהוֹדָאַת אֱמוּנָתֵנוּ׃
טו כִּי אֵין לָנוּ כּׂהֵן גָּדוֹל אֲשֶׁר לׂא־יוּכַל לְהִצְטָעֵר בְּחֳלָיֵינוּ כִּי אִם־מִתְנַסֶּה בַכּׂל כָּמוֹנוּ וּבְלִי־חֵטְא׃
טז עַל־כֵּן נִקְרְבָה בְּבִטָּחוֹן לִפְנֵי כִּסֵּא הֶחָסֶד לָשֵׂאת רַחֲמִים וְלִמְצׂא חֶסֶד לְעֶזְרָה בְּעִתָּהּ׃